2024: آرمی چیف کی بے مثال خدمات، خوارج کیخلاف آپریشنز میں اہم کامیابیاں

سال 2024 میں آرمی چیف جنرل عاصم منیر نے پاکستان کے لیے نمایاں خدمات انجام دیں اور ملک کی داخلی و خارجی سلامتی کو یقینی بنانے میں اہم کردار ادا کیا۔ دہشت گردی اور خوارج کے خلاف بھرپور کارروائیوں کے ذریعے پاکستان کو دہشت گردی کی لعنت سے نجات دلانے کی راہ میں اہم کامیابیاں حاصل کی گئیں۔

پاکستان میں دہشت گردوں اور ان کے سہولت کاروں کے خلاف 59 ہزار 775 انٹیلی جنس آپریشنز کیے گئے، جن کے نتیجے میں 925 دہشت گردوں کو ہلاک کیا گیا اور سیکڑوں کو گرفتار کیا گیا۔ ان کارروائیوں میں خوارج کے فتنہ کو جڑ سے ختم کرنے پر خصوصی توجہ دی گئی۔ آرمی چیف کا دہشت گردوں، ان کے سہولت کاروں اور خوارج کے بارے میں واضح اور دوٹوک مؤقف رہا، جس نے انٹیلی جنس اور سیکیورٹی اداروں کو مؤثر کارروائیاں کرنے کی حوصلہ افزائی دی۔

آرمی چیف نے افغانستان کی سرزمین سے آزادانہ دہشت گرد کارروائیوں پر پاکستان کے تحفظات کو بھی عالمی سطح پر اجاگر کیا۔ ان کا کہنا تھا کہ ایک پاکستانی کی جان اور اس کی حفاظت، افغانستان کے معاملات سے زیادہ اہم ہے۔ انہوں نے زور دیا کہ پاکستان اپنی سرحدوں کی حفاظت کے لیے کوئی سمجھوتہ نہیں کرے گا۔

ملک کے اندر گمراہ کن پروپیگنڈا، جعلی خبروں، اور غلط معلومات کے پھیلاؤ کی روک تھام کے لیے قانون سازی بھی کی گئی، جس نے قومی سلامتی اور اتحاد کو مزید مضبوط کرنے میں مدد دی۔ اس اقدام نے ملک میں امن و استحکام کی بحالی میں اہم کردار ادا کیا۔

بین الاقوامی محاذ پر پاکستان غزہ، لبنان، اور کشمیر کے مظلوم عوام کے لیے ایک مضبوط اور مؤثر آواز بن کر ابھرا۔ آرمی چیف نے ان خطوں میں ہونے والے مظالم کو اجاگر کرنے اور ان کے حق میں عالمی حمایت حاصل کرنے میں کلیدی کردار ادا کیا۔ ان کی قیادت میں پاکستان نے ان مسائل پر اقوام عالم میں اپنی موجودگی مضبوط کی اور انسانی حقوق کی حمایت میں اپنا مؤثر کردار ادا کیا۔

یہ خدمات آرمی چیف جنرل عاصم منیر کی بصیرت افروز قیادت اور ان کی واضح حکمت عملی کا نتیجہ تھیں، جنہوں نے ملک کو اندرونی و بیرونی خطرات سے نمٹنے کے لیے مستحکم بنیاد فراہم کی۔