وزیر دفاع خواجہ آصف نے اپنے بیان میں کہا ہے کہ آپریشن گولڈ اسمتھ کے ریکروٹ اور بانی تحریک انصاف عمران خان کی حمایت میں مہم چلانے والے عناصر پاکستان کے اندرونی معاملات میں مداخلت کر رہے ہیں۔ انہوں نے نومنتخب امریکی صدر ڈونلڈ ٹرمپ کے نامزد ایلچی رچرڈ گرینل کے حالیہ بیان پر سخت ردعمل دیتے ہوئے کہا کہ بانی تحریک انصاف کے حق میں مغرب سے اٹھنے والی آوازیں ان کے حقیقی عزائم کو بے نقاب کر رہی ہیں۔
خواجہ آصف نے مزید کہا کہ پاکستان کی عوام اپنے قومی مفادات کا تحفظ کرنا خوب جانتی ہے، اور ہماری اولین ترجیح ہمیشہ پاکستان رہی ہے اور رہے گی۔ انہوں نے ان غیر ملکی عناصر کو تنقید کا نشانہ بنایا جو عمران خان کی رہائی کے مطالبے کر رہے ہیں اور کہا کہ ان کے اقدامات ظاہر کرتے ہیں کہ وہ اسرائیل کے مفادات کے ساتھ وابستہ ہیں۔
وزیر دفاع نے دعویٰ کیا کہ عمران خان کو مغرب اور اسرائیل کی بھرپور حمایت حاصل ہے، اور ان کے ذریعے پاکستان کو نقصان پہنچانے کی سازشیں کی جا رہی ہیں۔ خواجہ آصف کے مطابق، بانی تحریک انصاف کو ایک ایسے اثاثے کے طور پر استعمال کیا جا رہا ہے جس کا مقصد واحد مسلم ایٹمی قوت کو کمزور کرنا اور اسے دباؤ میں لانا ہے۔
انہوں نے مزید کہا کہ پاکستانی عوام کو ان سازشوں سے آگاہ ہونا چاہیے اور قومی یکجہتی کو برقرار رکھتے ہوئے اپنے ملک کے دفاع اور سلامتی کے لیے پرعزم رہنا ہوگا۔ وزیر دفاع کا بیان اس بات کا اعادہ کرتا ہے کہ پاکستان کسی بھی بیرونی دباؤ یا مداخلت کو برداشت نہیں کرے گا اور اپنی خودمختاری کے تحفظ کے لیے ہر ممکن قدم اٹھائے گا۔
