کلثوم نیاز کی سربراہی میں کوئٹہ کے کلی قمبرانی میں شمولیتی پروگرام و یونٹ سازی کا انعقاد

 نیشنل پارٹی کی رکن بلوچستان اسمبلی کلثوم نیاز کی سربراہی میں کوئٹہ کے کلی قمبرانی میں شمولیتی پروگرام و یونٹ سازی کا انعقاد کیا گیا جس میں علاقے کی خواتین نے نیشنل پارٹی کے سربراہ ڈاکٹر مالک بلوچ کی قیادت پر اعتماد کرتے ہوئے نیشنل پارٹی میں شمولیت اختیار کی۔رکن صوبائی اسمبلی کلثوم نیاز کو علاقے کی خواتین نے علاقے کے مسائل سے آگاہ کیا جس میں گیس پریشر کی کمی، بجلی کی لوڈشیڈنگ اور پانی کی کمی جیسے مسائل شامل تھے۔

رکن صوبائی اسمبلی کلثوم نیاز اور نیشنل پارٹی کی صوبائی سیکریٹری برائے تعلیم سعدیہ بادینی نےخواتین سے خطاب کرتے ہوئے پارٹی میں نئی شامل ہونے والی خواتین کو خوش آمدید کرتے ہوئے کہا کہ اقتدار میں نہ ہونے کے باوجود جوق در جوق خواتین کی شمولیت اس بات کا ثبوت ہے کہ نیشنل پارٹی خواتین کی جملہ مسائل کے حل اور انھیں ترقی کے سفر میں شریک کرنے کے لیے کوشاں ہیں ۔

رکن صوبائی اسمبلی کلثوم نیوز نے خواتین کے مسائل توجہ اور ہمدردی سے سنے اور انھیں یقین دہانی کروائی کہ ان مسائل کو مکمل طور پر ختم تو نہیں کیا جا سکتا ہے لیکن کوشش سے ان مسائل میں کمی لائی جاسکتی ہے جو کہ ان کی ترجیحات میں اولین ترجیح ہے۔ اس موقع پر نیشنل پارٹی کی یونٹ سیکریٹری بی بی تحمینہ، ڈپٹی یونٹ سیکریٹری امام خاتون اور سلمیٰ، فریدہ اور بی بی گل نساء بطور کونسلران منتخب ہوئیں۔