جنوبی افریقہ 301 رنز بنا کر آوٹ، 90 رنز بنا کر آوٹ

پہلے ٹیسٹ میچ میں جنوبی افریقہ کی پور ی ٹیم پاکستان کیخلاف 301 رنز بنا کر آوٹ ہو گئی ہے اور 90 رنز کی برتری حاصل کر لی ہے ۔

تفصیلات کے مطابق جنوبی افریقہ کی جانب سے اوپننگ پر آنے والے ایڈن مرکرام نے شاندار بلے بازی کا مظاہرہ کرتے ہوئے 89 رنز کی اننگ کھیلی جبکہ ڈیبیو کرنے والے کوربن بوش نے 9 ویں نمبر پر آ کر 81 رنز کی انقلابی اننگ کھیل کر اپنی ٹیم کو بہت بڑی مصیبت سے بچا لیا ۔

کپتان ٹیمبا باووما 31 اور ڈیوڈ 30 رنز بنانے میں کامیاب ہوئے ۔  ان کے علاوہ جنوبی افریقہ کا کوئی کھلاڑی خاطر خواہ کارکردگی دکھانے میں کامیاب نہیں ہو پایا ۔

پاکستان کی جانب سے خرم شہزاد اور نسیم شاہ نے 3 ، 3 وکٹیں حاصل کیں جبکہ عامر جمال نے 2 کھلاڑیوں کو پولین کی راہ دکھائی ۔ محمد عباس اور صائم ایوب نے ایک ایک کھلاڑی کو آوٹ کیا ۔

اس سے قبل

پاکستان کی پوری ٹیم جنوبی افریقہ کیخلاف پہلے ٹیسٹ میچ میں پہلے روز کے اختتام سے قبل ہی 211 رنز بنا کر آوٹ ہو گئی ۔

 جنوبی افریقہ نے ٹاس جیت کر باولنگ کا فیصلہ کیا جس پر پاکستان کی جانب سے صائم ایوب اور کپتان شان مسعود نے میدان میں اتر کر کھیل کا آغاز کیا ۔

اوپننگ پر آئے کپتان شان مسعود محض 17 رنز ہی بنانے میں کامیاب ہوئے ،  شان مسعود نے ڈیبیو کرنے والے جنوبی افریقہ باولر بوش کی گیند کو کٹ کر کے چوکا لگا نے کی کوشش کی لیکن گیند بلے کے کنارے سے ٹکراتی ہوئی پیچھے سلپ پر موجود جانسن کے ہاتھوں میں جا پہنچی اور وہ 40 کے مجموعے پر پولین پہنچ گئے ۔

ان کے ساتھ میدان میں اترنے والے صائم ایوب بھی کچھ خاص کارکردگی دکھانے میں کامیاب نہیں ہو پائے ،  صائم نے پیٹرسن کی گیند کو بلاک کرنے کی کوشش کی لیکن وہ معمولی سی بیٹ کے کنارے سے ٹکراتی ہوئی ویرین کے ہاتھوں میں جا پہنچی اور وہ 14 رنز بنا کر پولین لوٹ گئے ۔

ان کے بعد اگلی وکٹ بابراعظم کی 41 رنز کے مجموعے پر گری ، انہوں نے پیٹرسن کی گیند پر شاٹ لگانے کی کوشش کی لیکن گیند ایک مرتبہ پھر بلے کے کنارے سے ٹکراتی ہوئی سلپ پر موجود تھرڈ مین کے ہاتھوں میں پہنچی جس کے باعث بابراعظم 4 رنز بنا کر آوٹ ہو گئے ۔