بے سود جنگ کسی بھلائی کا سبب نہیں بن سکتی، وزیراعلیٰ سرفراز بگٹی

کوئٹہ: وزیراعلیٰ بلوچستان سرفراز بگٹی نے کہا ہے کہ بلوچستان کے عوام ریاست پاکستان کے ساتھ کھڑے ہیں کیونکہ ہمارا مستقبل ملک کے ساتھ وابستہ ہے۔

نوکنڈی کے معدنیات سے مالا مال علاقے کے دورے کے دوران ایک عوامی اجتماع سے خطاب کرتے ہوئے انہوں نے کہا کہ بے سود جنگ کسی بھلائی کا سبب نہیں بن سکتی، اور بلوچستان کے عوام کے حقوق حاصل کرنے کے لیے ریاست پاکستان کے ساتھ کندھے سے کندھا ملا کر کھڑے ہونے کی ضرورت ہے۔

اس موقع پر صوبائی وزیر خزانہ، کان کنی اور معدنیات میر شعیب نوشیروانی، سینیٹر دانش کمار اور ایم این اے عثمان بادینی بھی موجود تھے۔

وزیراعلیٰ نے کہا کہ ماضی کی صوبائی حکومتوں اور بیوروکریسی میں سالانہ بجٹ کو استعمال کرنے کی صلاحیت کا فقدان تھا، لیکن اس بار حکومت پُرعزم ہے کہ صوبے میں کم از کم 90 فیصد بجٹ ترقیاتی منصوبوں پر خرچ کیا جائے گا۔