بلوچستان میں 25 ہزارنوجوانوں کو انفارمیشن ٹیکنالوجی کی تعلیم سے آراستہ کریں گے ،سیلانی ویلفیئر انٹرنیشنل ٹرسٹ

سیلانی ویلفیئر انٹر نیشنل ٹرسٹ کے صدر امین لاکھانی اور ٹرسٹی افضل چمدیہ نے کہا ہے کہ بلوچستان میں 25ہزار نوجوانوں کو انفارمیشن ٹیکنالوجی کی تعلیم سے آراستہ کریں گے ،اس مقصد کیلئے کوئٹہ میں آئی ٹی لیب کا افتتاح کیا جارہا ہے مناسب جگہ ملے تو ہم بلوچستان میں بھی میگا آئی ٹی سٹی بنائیں گے۔ان خیالات کا اظہار انہوں نے بدھ کے روز ایوان صنعت و تجارت کوئٹہ بلوچستان کے عہدیداران و ممبران کے ساتھ منعقدہ اجلاس کے شرکا سے خطاب کرتے ہوئے کیا۔اس سے قبل چیمبر آف کامرس اینڈ انڈسٹری کوئٹہ بلوچستان کے ایگزیکٹو ممبر و چیئرمین قائمہ کمیٹی برائے میونسپل سروسز سردار زین العابدین خلجی ،آغا فیصل ودیگر نے سیلانی ویلفیئر انٹر نیشنل ٹرسٹ کے صدر امین لاکھانی اور ان کے وفد میں شامل دیگر افراد کا چیمبر آف کامرس اینڈ انڈسٹری کوئٹہ بلوچستان آنے پر استقبال کرتے ہوئے کہا کہ سیلانی ویلفیئر انٹر نیشنل ٹرسٹ کی جانب سے نوجوانوں کو فنی تربیت دینے،چھوٹے کاروبار کی حوصلہ افزائی اور لاکھوں افراد کیلئے دسترخوان لگانے جیسی خدمات اپنی مثال آپ ہیں ،ہم بلوچستان میں نوجوانوں کو آئی ٹی تربیت کے آغاز کو بھی نیک شگون سمجھتے ہیں بلکہ اس بابت چیمبر آف کامرس اینڈ انڈسٹری کوئٹہ بلوچستان ٹرسٹ کے ساتھ ہر ممکن تعاون کیلئے بھی تیار ہے۔

اس موقع پر سیلانی ویلفیئر انٹر نیشنل ٹرسٹ کے صدر امین لاکھانی اور ٹرسٹی افضل چمدیہ ا کہنا تھا کہ ہم بلوچستان میں بھی نوجوانوں کو انفارمیشن ٹیکنالوجی کی تعلیم سے آراستہ کرنے کا سلسلہ شروع کر رہے ہیں اسی لئے آج کوئٹہ میں آئی ٹی لیب کا افتتاح کیا جارہا ہے ۔ انہوں نے کہا کہ ایوب سٹیڈیم کوئٹہ میں آئی ٹی تربیت کیلئے ٹیسٹ کا انعقاد کیا جا رہا ہے ،فی الحال ہم بلوچستان میں 500 نوجوانوں کو آئی ٹی سے متعلق تربیت دیں گے ۔انہوں نے کہا کہ ٹرسٹ کو سالانہ 13 ارب روپے کے عطیات مل رہے ہیں جسے بروئے کار لاتے ہوئے ناصرف ڈھائی لاکھ افراد کو کھانا کھلایا جا رہا ہے بلکہ نوجوانوں کیلئے آئی ٹی ٹریننگ ودیگر منصوبوں پر بھی کام جاری ہیں ۔انہوں نے کہا کہ ٹرسٹ کے بانی علامہ بشیر فاروقی نے 2013 میں ملک کے قرضے اتارنے کیلئے آئی ٹی کے شعبے پر توجہ دینے کے مشن کا آغاز کیا اور اب تک ہم 2لاکھ نوجوانوں کو تربیت دے چکے ہیں ۔انہوں نے کہا کہ بلوچستان میں مناسب جگہ ملی تو ہم میگا آئی ٹی سٹی بنائیں گے ہم دراصل انٹر پینیور ہیں ،آپ اچھے اور سچے ہو تو پھر دنیا ضرور ساتھ دیتی ہے۔سعید احمد کا کہنا تھا کہ ہم کوئٹہ میں 6مقامات پر دسترخوان لگا رہے ہیں جن سے مختلف اضلاع سے کوئٹہ میں زیر تعلیم طلبا بھی مستفید ہو رہے ہیں ،کسی لاچار کو کھانا کھلانا اور ہنر سکھانا بہترین کار خیر ہے۔آخر میں سیلانی ویلفیئر انٹر نیشنل ٹرسٹ کے صدر کو چیمبر آف کامرس اینڈ انڈسٹری کوئٹہ بلوچستان کی جانب سے یادگاری شیلڈ پیش کی گئی ۔